एस. एम. जोशी कॉलेजमध्ये ‘कर्मवीर’ शॉर्ट फिल्म फेस्टिव्हल संपन्न
डॉ.अतुल चौरे : हडपसर
प्रतिनिधी | दि. १० फेब्रुवारी २०२६|
हडपसर, पुणे
रयत शिक्षण संस्थेच्या एस. एम. जोशी कॉलेज, हडपसर, पुणे येथील मास कम्युनिकेशन अँड जर्नलिझम विभागाच्या वतीने आयोजित करण्यात आलेला ‘कर्मवीर’ शॉर्ट फिल्म फेस्टिव्हल उत्साहात संपन्न झाला. या उपक्रमाचे उद्घाटन महाविद्यालयाचे प्राचार्य प्रो. डॉ. एकनाथ मुंढे यांच्या हस्ते करण्यात आले. तसेच विभागप्रमुख डॉ. अतुल चोरे यांच्या मार्गदर्शनाने हा उपक्रम यशस्वीपणे संपन्न झाला. कार्यक्रमाचे समन्वयक म्हणून प्रा. दिपक ईशी व प्रा. कुलदीप चव्हाण यांनी प्रभावी नियोजन केले.
विद्यार्थ्यांमधील सर्जनशीलता, सामाजिक जाणिवा आणि चित्रपट माध्यमाची समज वृद्धिंगत करण्याच्या उद्देशाने हा उपक्रम राबविण्यात आला. दिनांक २ ते ७ फेब्रुवारी २०२६ या कालावधीत दररोज सायंकाळी आयोजित करण्यात आलेल्या या फेस्टिव्हलमध्ये मराठी तसेच स्पॅनिश भाषेतील एकूण सहा लघुपटांचे प्रदर्शन करण्यात आले. पावसाचा निबंध, आयडेंटिटी, घड्याळांचा दवाखाना, चैत्र, २+२=५ आणि मयत या लघुपटांनी प्रेक्षकांचे लक्ष वेधून घेतले.
या लघुपटांमधून सामाजिक, भावनिक व समकालीन प्रश्नांवर प्रभावी मांडणी करण्यात आली. नवोदित तसेच अभ्यासू दिग्दर्शकांच्या कलाकृतींना विद्यार्थ्यांनी आणि प्रेक्षकांनी उत्स्फूर्त प्रतिसाद दिला.
या उपक्रमासाठी महाविद्यालयातील आयक्यूएसी समन्वयक प्रा. संजय अहिवळे, उपप्राचार्य प्रो. डॉ. किशोर काकडे, उपप्राचार्य प्रो. डॉ. दिनकर मुरकुटे, उपप्राचार्य डॉ. संजय जगताप व मराठी विभागप्रमुख प्रा. राधाकिसन मुठे उपस्थित होते. ‘कर्मवीर’ शॉर्ट फिल्म फेस्टिव्हलमुळे विद्यार्थ्यांच्या कलागुणांना व्यासपीठ मिळाले असून, सामाजिक भान जपणाऱ्या चित्रपटांची ओळख प्रेक्षकांना झाली, अशी प्रतिक्रिया आयोजकांनी व्यक्त केली.
✍🏻मुख्य संपादक – सुभाष कदम
