सिध्देश्वर – वारकरी संस्था आयोजित देऊळगाव – राजे ( श्री क्षेत्र सिध्दटेक ते क्षेत्र पंढरपूर आषाढी पायी वारी सोहळा वै. महापुरुष तात्यामहाराज व ब्रम्हमध्व गौडीया वैष्णव संप्रदायाचे प. पु. भक्तीनिवास पदनाभ गोसावी महाराज यांच्या प्रेरणेने सुरु असलेल्या या सोहळ्याचे १९ वे वर्ष असून या सोहळ्यासाठी राजकीय, धार्मिक, सामाजिक, शैक्षणिक, कृषी, वैद्यकीय, हॉटेल व्यावसायिक,महिला, पुरुष, तरुण वर्ग, सामाजिक संस्था,किर्तनकार, मृदंगाचार्य,चोपदार,गायक, टाळकरी, भजनीमंडळ, विणेकरी व जेष्ठ नागरिकांचे विशेष सहकार्य लाभत असल्याने हा दिंडी सोहळा हरिनामाच्या जयघोषामध्ये मजल दरमजल करीत पंढरीच्या पांडुरंगाच्या दर्शनासाठी मार्गस्थ होत असताना सिध्देश्वर मंदिर देऊळगाव राजे येथे मानवरांच्या हस्ते दिंडी सोहळ्याचे पूजन करण्यात आले. येथून प्रस्थान होऊन देऊळगाव राजे गावाला प्रदक्षिणा करून दिंडी सोहळा मार्गस्थ झाला . या प्रसंगी देऊळगाव राजे जिल्हा परिषदेच्या प्राथमिक शाळेच्या व अंगणवाडीच्या बाल वारकर्यांनी काढलेल्या दिंडीने व बाल वारकर्यांच्या गायन, वादन व नृत्याने तसेच महिलांच्या फुगड्या, गायन यांमूळे दिंडी सोहळ्याला वेगळेच आकर्षण निर्माण झाले होते. यावेळी, ग्रामस्थ, अंगणवाडी प्रमुख व त्यांचे सर्व कर्मचारी,केंद्रप्रमुख,शाळेचे मुख्याध्यापक, सर्व शिक्षक व शिक्षिका मोठ्या संखेने सहभागी झाले होते.
यावर्षी या दिंडी सोहळा प्रस्थानाच्या प्रसंगी वरुणराजानेही हजेरी लावल्याने वारकर्यांच्या चेहर्यावर वेगळाच आनंद दिसत होता. दिंडी सोहळ्याच्या मार्गवर अनेक ठिकाणी नाष्टा, जेवण, निवासाची व्यवस्था करून भावीक या सोहळ्याच्या आनंद उत्सवात सहभागी होत आहेत. वारीच्या वाटेवर मुक्कामाच्या ठिकाणी किर्तनसेवा देण्यासाठी ह.भ.प. हरि महाराज को-हाळे,दिगंबर महाराज पवार, यशवंत महाराज कदम, केशव महाराज पवार यांच्या किर्तन सेवांमूळे वातावरण भक्तिमय झालेले आहे.
परतीच्या पायी वारीनंतर देऊळगाव राजे येथे ह.भ.प. हरि महाराज को-हाळे यांचे काल्याचे किर्तन होणार असून पंचक्रोशीतील सर्व वारकरी व ग्रामस्यांनी काल्याच्या महाप्रसादाचा लाभ घेण्यासाठी उपस्थित रहावे.
✍🏻मुख्य संपादक – सुभाष कदम
