सायनशास्त्र विभागामार्फत मृदा व जल विश्लेषण सल्लागार केंद्राचे उद्घाटन
डॉ.अतुल चौरे : हडपसर
हडपसर, पुणे | दि. १० फेब्रुवारी २०२६
सायनशास्त्र विभागामार्फत “अंतर्गत मृदा व जल विश्लेषण सल्लागार केंद्राच्या उद्घाटन” समारंभाचे आयोजन दि. ९ फेब्रुवारी २०२६ रोजी यशस्वीपणे करण्यात आले. या महत्त्वपूर्ण उपक्रमाचे उद्घाटन श्री. विठ्ठल रणवाडे यांच्या शुभहस्ते संपन्न झाले. हा कार्यक्रम प्राचार्य प्रो. डॉ. एकनाथ मुंढे यांच्या अध्यक्षतेखाली पार पडला. यावेळी उपप्राचार्य प्रो. डॉ. किशोर काकडे, प्रा. डॉ. रंजना जाधव (प्रमुख, रसायनशास्त्र विभाग) तसेच रसायनशास्त्र विभागातील सर्व प्राध्यापकवृंद उपस्थित होते.
उद्घाटनप्रसंगी श्री. विठ्ठल रणवाडे यांनी आपल्या मार्गदर्शनपर भाषणातून मृदा व जल परीक्षणाचे वाढते महत्त्व, कृषी उत्पादनाची गुणवत्ता सुधारण्यासाठी अशा सल्लागार केंद्रांची गरज तसेच विद्यार्थ्यांसाठी उपलब्ध होणाऱ्या संशोधन व कौशल्यविकासाच्या संधी यांवर सविस्तर प्रकाश टाकला.
कार्यक्रमाचे अध्यक्ष प्राचार्य प्रो. डॉ. एकनाथ मुंढे यांनी मृदा व जल विश्लेषण सल्लागार केंद्राच्या स्थापनेमागील उद्दिष्टे स्पष्ट करत, शेतकरी, विद्यार्थी व समाजासाठी या केंद्राचे असणारे उपयुक्तत्व आणि पर्यावरणीय संतुलनाच्या दृष्टीने त्याचे महत्त्व अधोरेखित केले.
कार्यक्रमाचे प्रास्ताविक डॉ. राजकुमार हंगारगे यांनी केले. या कार्यक्रमास महाविद्यालयातील विविध शाखांतील विद्यार्थी मोठ्या संख्येने उपस्थित होते. विद्यार्थ्यांनी या उपक्रमाबाबत उत्सुकता व्यक्त करत, या केंद्राचा शैक्षणिक व व्यावहारिक उपयोग निश्चितच लाभदायक ठरेल, असा विश्वास व्यक्त केला.
कार्यक्रम यशस्वीरीत्या पार पडण्यासाठी रसायनशास्त्र विभागातील सर्व प्राध्यापक व कर्मचाऱ्यांनी विशेष परिश्रम घेतले.
✍🏻मुख्य संपादक – सुभाष कदम
