एस. एम. जोशी कॉलेजमध्ये मुलींसाठी ‘निर्भय कन्या अभियान’ अंतर्गत कराटे प्रशिक्षण कार्यशाळा संपन्न
डॉ.अतुल चौरे : हडपसर
प्रतिनिधी : हडपसर | दिनांक : ३० जानेवारी २०२६
सावित्रीबाई फुले पुणे विद्यापीठाच्या विद्यार्थी विकास मंडळाच्या मार्गदर्शनाखाली रयत शिक्षण संस्थेच्या एस. एम. जोशी कॉलेज, हडपसर, पुणे येथील विद्यार्थी विकास मंडळ व क्रीडा विभाग यांच्या संयुक्त विद्यमाने ‘निर्भय कन्या अभियान’ अंतर्गत एकदिवसीय कराटे प्रशिक्षण कार्यशाळेचे आयोजन करण्यात आले. ही कार्यशाळा शुक्रवार, दिनांक ३० जानेवारी २०२६ रोजी सकाळी ९.०० वाजता महाविद्यालयाच्या इनडोअर हॉलमध्ये उत्साहात संपन्न झाली.
या कार्यक्रमासाठी प्रमुख पाहुणे म्हणून दादा पाटील महाविद्यालय, कर्जत येथील प्राचार्य प्रो. डॉ. संजय नगरकर उपस्थित होते. त्यांनी ‘फिजिकल फिटनेस व स्वसंरक्षण’ या विषयावर विद्यार्थिनींना मार्गदर्शन केले. महिलांच्या सर्वांगीण विकासासाठी स्वसंरक्षण प्रशिक्षणाची नितांत गरज असून कराटे ही केवळ आत्मसंरक्षणाची कला नसून ती शिस्त, आत्मविश्वास, मानसिक स्थैर्य आणि शारीरिक तंदुरुस्ती यांचा समन्वय साधणारी जीवनशैली आहे, असा विचार त्यांनी आपल्या भाषणातून मांडला.
या कार्यशाळेसाठी महाराष्ट्र पोलीस कोच व अनुभवी कराटे प्रशिक्षक मा. श्री. लहु पारवे यांचे विशेष मार्गदर्शन लाभले. त्यांनी आपल्या सखोल अनुभवाच्या आधारे विद्यार्थिनींना स्वसंरक्षणाचे महत्त्व समजावून सांगत कराटेतील मूलभूत तंत्रांचे प्रात्यक्षिक सादर केले. प्रशिक्षणादरम्यान उभे राहण्याची योग्य पद्धत, हात-पायांचे बचावात्मक वार, शत्रूपासून स्वतःचे संरक्षण करण्याच्या विविध युक्त्या, श्वसन पद्धती तसेच शारीरिक तंदुरुस्तीसाठी आवश्यक व्यायाम प्रकारांचे प्रात्यक्षिकांसह प्रशिक्षण देण्यात आले. विद्यार्थिनींनी या प्रशिक्षणात अत्यंत उत्साहाने व शिस्तबद्ध पद्धतीने सहभाग घेतला.
कार्यक्रमाच्या अध्यक्षस्थानी महाविद्यालयाचे प्राचार्य प्रो. डॉ. एकनाथ मुंढे उपस्थित होते. अध्यक्षीय भाषणात त्यांनी महिलांच्या सक्षमीकरणासाठी अशा प्रशिक्षणात्मक उपक्रमांची आवश्यकता अधोरेखित केली. स्वसंरक्षण प्रशिक्षणामुळे विद्यार्थिनींमध्ये आत्मभान, मानसिक बळ, निर्णयक्षमता व निर्भयतेची भावना विकसित होते, असे त्यांनी नमूद केले. शिक्षणाबरोबरच जीवनकौशल्यांचे प्रशिक्षण महत्त्वाचे असून महाविद्यालय अशा उपक्रमांद्वारे विद्यार्थ्यांच्या सर्वांगीण विकासासाठी कटिबद्ध असल्याचे त्यांनी स्पष्ट केले.
कार्यक्रमाची सुरुवात प्रास्ताविक व स्वागताने झाली. प्रास्ताविक डॉ. अतुल चौरे यांनी केले, तर पाहुण्यांचा परिचय डॉ. ज्योती किरवे यांनी करून दिला. मान्यवर पाहुण्यांचे स्वागत महाविद्यालयाचे प्राचार्य यांच्या हस्ते करण्यात आले. या कार्यक्रमास महाविद्यालयाचे उपप्राचार्य प्रो. डॉ. दिनकर मुरकुटे, प्रा. सफिया मुरसल, प्रा. अजित भोसले उपस्थित होते. कार्यक्रमाच्या यशस्वी आयोजनासाठी विद्यार्थी विकास मंडळ, क्रीडा विभाग तसेच स्वयंसेवक विद्यार्थ्यांनी विशेष परिश्रम घेतले. कार्यक्रमाच्या शेवटी डॉ. संजय जगताप यांनी उपस्थित सर्व मान्यवर, प्रशिक्षक व सहभागी विद्यार्थिनींचे आभार मानले. संपूर्ण कार्यक्रमाचे सूत्रसंचालन डॉ. सुशांत मोकळ यांनी प्रभावीपणे केले.
✍🏻मुख्य संपादक – सुभाष कदम
