एस. एम. जोशी कॉलेजमध्ये आंतरराष्ट्रीय महिला दिनानिमित्त विशेष व्याख्यान
डॉ.अतुल चौरे : हडपसर
प्रतिनिधी / दि. ११ मार्च २०२६ / हडपसर
एस. एम. जोशी कॉलेजमधील महिला सबलीकरण कक्षाच्या वतीने आंतरराष्ट्रीय महिला दिनानिमित्त विशेष व्याख्यानाचे आयोजन महाविद्यालयाचे प्राचार्य प्रा. (डॉ.) एकनाथ मुंढे यांच्या मार्गदर्शनाखाली करण्यात आले. या कार्यक्रमासाठी लेखापरीक्षा संचालनालय, नवी मुंबई येथील सहसंचालक नंदा चिंधे या प्रमुख पाहुण्या म्हणून उपस्थित होत्या, तर कार्यक्रमाच्या अध्यक्षस्थानी उपप्राचार्य प्रा. (डॉ.) किशोर काकडे उपस्थित होते.
मार्गदर्शन करताना नंदा चिंधे म्हणाल्या की, महिलांनी व मुलींनी आर्थिक व्यवहार करताना पुढाकार घेतला पाहिजे आणि कोणताही संकोच बाळगू नये. आपण कमावलेल्या पैशाचे योग्य नियोजन करता येणे ही आजच्या काळाची गरज आहे. मी कुठे कमावते? या विचारामुळे अनेक मुली व महिला आर्थिक साक्षरतेपासून दूर राहतात. त्यामुळे हा विचार बदलून आर्थिक साक्षरतेकडे वाटचाल करणे आवश्यक आहे. आर्थिक साक्षरतेबरोबरच महिलांनी स्वतःच्या आरोग्याकडेही विशेष लक्ष दिले पाहिजे, असा संदेश त्यांनी दिला.
अध्यक्षीय मनोगत व्यक्त करताना प्रा. (डॉ.) किशोर काकडे म्हणाले की, भारतीय समाजातील वाईट चाली-रुढी बंद करण्यासाठी अनेक समाजसुधारकांनी मोठे कार्य केले आहे. त्यांच्या कार्याची आठवण आपण सतत ठेवली पाहिजे. आंतरराष्ट्रीय महिला दिनाच्या निमित्ताने स्त्री चळवळ आणि त्यातून महिलांना मिळालेले हक्क याबाबत त्यांनी मार्गदर्शन केले.
या प्रसंगी महाविद्यालयातील सर्व महिला प्राध्यापकांचा गुलाबपुष्प व पेन देऊन सत्कार करण्यात आला. कार्यक्रमाचे प्रास्ताविक व पाहुण्यांचा परिचय समितीच्या चेअरमन डॉ. निशा गोसावी यांनी करून दिला. कार्यक्रमाचे सूत्रसंचालन डॉ. छाया सकटे यांनी केले, तर आभार प्रदर्शन डॉ. ज्योती किरवे यांनी केले. या कार्यक्रमाला उपप्राचार्य डॉ. संजय जगताप, प्रा. (डॉ.) रंजना जाधव, डॉ. संगीता यादव तसेच महाविद्यालयातील सर्व महिला प्राध्यापिका उपस्थित होत्या.
✍🏻मुख्य संपादक – सुभाष कदम
