एस. एम. जोशी कॉलेजमध्ये राज्यस्तरीय प्रश्नमंजूषा स्पर्धा-२०२६ पारितोषिक वितरण समारंभ संपन्न
डॉ.अतुल चौरे : हडपसर
प्रतिनिधी – हडपसर, १७ जानेवारी
रयत शिक्षण संस्था, कर्मवीर विद्याप्रबोधिनी, सातारा आयोजित पद्मभूषण डॉ. कर्मवीर भाऊराव पाटील राज्यस्तरीय महाविद्यालयीन प्रश्नमंजूषा स्पर्धा-२०२६ चा पारितोषिक वितरण समारंभ शनिवार, १७ जानेवारी २०२६ रोजी एस. एम. जोशी कॉलेज, हडपसर येथे संपन्न झाला.
कार्यक्रमाचे प्रमुख पाहुणे तथा कर्मवीर विद्याप्रबोधिनीचे कार्यकारी संचालक, प्रिं. डॉ. विजयसिंह सावंत साहेब विद्यार्थ्यांना मार्गदर्शन करताना म्हणाले की,
“प्रश्नमंजुषेला पौराणिक व ऐतिहासिक पार्श्वभूमी लाभली आहे. उखाणे, म्हणी, कोडी या माध्यमातून प्रश्नोत्तरांची परंपरा प्राचीन काळापासून अस्तित्वात आहे. आजच्या स्पर्धात्मक युगात प्रश्नमंजूषा विद्यार्थ्यांना स्पर्धा परीक्षांसाठी नवी दिशा दाखवते. या स्पर्धेमुळे अनेक विद्यार्थी प्रशासकीय सेवेत पोहोचले आहेत. पुढील काळातही या स्पर्धेतून अनेक विद्यार्थी क्लास वन पदावर विराजमान होतील,” असे त्यांनी सांगितले.
कार्यक्रमाचे अध्यक्ष उपप्राचार्य प्रो. डॉ. किशोर काकडे म्हणाले, “विद्यार्थ्यांनी अधिकाधिक स्पर्धा परीक्षेकडे वळावे या उद्देशाने गेली १९ वर्षे ही राज्यस्तरीय स्पर्धा आयोजित केली जाते. एम.पी.एस.सी. व यू.पी.एस.सी. परीक्षांसाठी आवश्यक असलेली पायाभूत समज, आत्मविश्वास आणि प्रश्नसंचाचे भान या स्पर्धेमुळे वाढते. राज्यभरातील असंख्य विद्यार्थ्यांना या स्पर्धेचा प्रत्यक्ष लाभ झाला असून अनेक विद्यार्थी प्रशासकीय सेवेत दाखल झाले आहेत,” असे त्यांनी स्पष्ट केले.
कार्यक्रमाच्या प्रसंगी राज्यशास्त्र विभागप्रमुख डॉ. छाया सकटे यांच्या “लोकप्रशासन भाग-२” या ग्रंथाचे प्रकाशन मान्यवरांच्या हस्ते करण्यात आले. विजयी स्पर्धकांचा मान्यवरांच्या हस्ते प्रमाणपत्र, सन्मानचिन्ह आणि रोख रक्कम देऊन गौरव करण्यात आला.
स्पर्धेचे विजेते
प्रथम पारितोषिक: इस्माईलसाहेब मुल्ला लॉ कॉलेज, सातारा
(प्रतिक पन्हाळे, शंतनू पिसाळ)
द्वितीय पारितोषिक: सद्गुरु गाडगे महाराज कॉलेज, कराड
(ऋतुजा यादव, नेहा जाधव)
तृतीय पारितोषिक: एस. एम. जोशी कॉलेज, हडपसर
(तृप्ती दोढमिसे, निरंजन सागर)
उत्तेजनार्थ प्रथम: वाघेरे महाविद्यालय, सासवड
(पूजा कुंजीर, तेजस रासकर)
उत्तेजनार्थ द्वितीय: बळवंत कॉलेज, विटा
(प्रतिक मंडले, प्रफुल्ल जावीर)
कार्यक्रमाचे प्रास्ताविक व स्वागत समन्वयक डॉ. अतुल चौरे, पाहुण्यांचा परिचय उपप्राचार्य डॉ. संजय जगताप तर आभार प्रदर्शन उपप्राचार्य प्रो. डॉ. दिनकर मुरकुटे यांनी केले. कार्यक्रमाचे सूत्रसंचालन डॉ. नम्रता कदम व डॉ. अर्चना पाटील यांनी केले. महाविद्यालयीन प्रश्नमंजुषा स्पर्धेसाठी राज्यभरातील विविध जिल्ह्यांमधून एकूण ५४ स्पर्धक विद्यार्थ्यांनी उत्साहपूर्वक सहभाग नोंदवला.
✍🏻मुख्य संपादक – सुभाष कदम
