एस. एम. जोशी कॉलेजमध्ये राष्ट्रीय विज्ञान दिन सप्ताह उत्साहात संपन्न
डॉ.अतुल चौरे : हडपसर
प्रतिनिधी | हडपसर | २८ फेब्रुवारी २०२६
एस. एम. जोशी कॉलेज येथील सायन्स असोसिएशनच्या वतीने राष्ट्रीय विज्ञान दिन सप्ताह दि. २३ ते २८ फेब्रुवारी २०२६ या कालावधीत सर्व विज्ञान विभागांच्या सहभागाने महाविद्यालयाचे प्राचार्य प्रा. (डॉ.) एकनाथ मुंढे यांच्या मार्गदर्शनाखाली उत्साहात साजरा करण्यात आला.
दरवर्षी २८ फेब्रुवारी रोजी साजरा होणारा राष्ट्रीय विज्ञान दिन हा भारतीय शास्त्रज्ञ सी. व्ही. रामन यांच्या रामन परिणाम या ऐतिहासिक शोधाच्या स्मरणार्थ साजरा केला जातो. विद्यार्थ्यांमध्ये वैज्ञानिक दृष्टिकोन, संशोधनवृत्ती व नवोन्मेषाची भावना रुजविणे हा या उपक्रमामागील मुख्य उद्देश होता.
विज्ञान दिन सप्ताहांतर्गत विज्ञान प्रश्नमंजुषा, विज्ञान प्रकल्प व प्रतिकृती प्रदर्शन, वादविवाद व निबंध लेखन स्पर्धा, शालेय विद्यार्थ्यांसाठी विभागीय उपक्रम, विद्यार्थी परिसंवाद व शोधनिबंध सादरीकरण, पोस्टर सादरीकरण स्पर्धा तसेच तज्ज्ञ व अतिथी व्याख्याने अशा विविध उपक्रमांचे आयोजन करण्यात आले. या सर्व उपक्रमांना विद्यार्थ्यांचा उत्स्फूर्त प्रतिसाद लाभला.
दि. २८ फेब्रुवारी २०२६ रोजी विशेष व्याख्यानाचे आयोजन करण्यात आले. यावेळी मा. पांडुरंग कानकाटे, पोलीस निरीक्षक, फिंगरप्रिंट ब्युरो, CID, मुंबई यांनी गुन्हे अन्वेषणातील विज्ञानाचे महत्त्व तसेच MPSC परीक्षेच्या तयारीबाबत विद्यार्थ्यांना मार्गदर्शन केले.
राष्ट्रीय विज्ञान दिन सप्ताह हा उपक्रम सर्व विज्ञान विभागांच्या सक्रिय सहभागामुळे यशस्वी ठरला. या यशस्वी आयोजनासाठी महाविद्यालयाचे प्राचार्य प्रा. (डॉ.) एकनाथ मुंढे, सायन्स असोसिएशन प्रमुख प्रा. (डॉ.) रंजना जाधव, सर्व विभागप्रमुख, प्राध्यापकवर्ग व विद्यार्थ्यांचे सहकार्य लाभले.
✍🏻मुख्य संपादक – सुभाष कदम
