एस. एम. जोशी महाविद्यालयाच्या प्र. प्राचार्यपदी प्रो. डॉ. एकनाथ मुंढे यांची नियुक्ती
डॉ.अतुल चौरे : हडपसर
प्रतिनिधी | २९ डिसेंबर | हडपसर, पुणे
रयत शिक्षण संस्था, सातारा संचलित एस. एम. जोशी महाविद्यालय, हडपसर, पुणे येथील प्र. प्राचार्यपदी प्रो. डॉ. एकनाथ मुंढे यांची नियुक्ती करण्यात आली आहे. त्यांच्या या नियुक्तीमुळे महाविद्यालयाच्या शैक्षणिक, संशोधन व प्रशासकीय कार्याला नवी दिशा मिळेल, अशी अपेक्षा व्यक्त करण्यात येत आहे.
प्रो. डॉ. एकनाथ मुंढे हे अर्थशास्त्र विषयातील ज्येष्ठ व अनुभवी प्राध्यापक असून त्यांना पदवी स्तरावर २५ वर्षे आणि पदव्युत्तर स्तरावर १० वर्षांचा अध्यापनाचा समृद्ध अनुभव आहे. बँकिंग व वित्त, कृषी अर्थशास्त्र तसेच वर्तनात्मक अर्थशास्त्र ही त्यांची विशेष अभ्यासक्षेत्रे आहेत. त्यांनी स्वामी रामानंद तीर्थ मराठवाडा विद्यापीठ, नांदेड येथून अर्थशास्त्र विषयात पीएच.डी. पदवी प्राप्त केली असून सेट (अर्थशास्त्र) परीक्षेतही त्यांनी यश संपादन केले आहे. संशोधन क्षेत्रात त्यांचे मोलाचे योगदान असून UGC Care/Scopus/Peer Reviewed जर्नल्समध्ये ३० शोधनिबंध, प्रोसीडिंगमध्ये १० शोधनिबंध, १ पुस्तक, १२ संपादित पुस्तके तसेच ८ संपादित पुस्तकांतील प्रकरणे त्यांच्या नावावर आहेत. याशिवाय त्यांच्या नावावर ४ भारतीय पेटंट्स प्रकाशित झालेली आहेत. राष्ट्रीय व आंतरराष्ट्रीय स्तरावरील अनेक परिषद, सेमिनार, कार्यशाळा व वेबिनारमध्ये त्यांनी शोधनिबंध सादर केले आहेत.
लोकनेते रामशेठ ठाकूर कला, विज्ञान व वाणिज्य महाविद्यालय, मोखाडा येथे त्यांनी प्र. प्राचार्य म्हणून यशस्वी शैक्षणिक प्रशासनाचा अनुभव मिळविला आहे. तसेच के. बी. पी. कॉलेज, वाशी (स्वायत्त) येथे अर्थशास्त्र, बिझनेस इकॉनॉमिक्स व फाउंडेशन कोर्ससाठी BoS चेअरमन म्हणून त्यांनी कार्य केले आहे. डी. जी. कॉलेज ऑफ कॉमर्स, सातारा (स्वायत्त) येथे बँकिंग व वित्त विषयासाठी BoS सदस्य म्हणूनही ते कार्यरत आहेत. आतापर्यंत २५ पेक्षा अधिक सेमिनार, कार्यशाळा व परिषदांचे आयोजन त्यांच्या मार्गदर्शनाखाली यशस्वीपणे पार पडले आहे. त्यांच्या या नियुक्तीबद्दल रयत शिक्षण संस्थेचे पदाधिकारी, महाविद्यालय विकास समितीचे सदस्य, प्राध्यापक, शिक्षकेतर कर्मचारी व विद्यार्थ्यांनी समाधान व्यक्त करत त्यांना पुढील कार्यकाळासाठी शुभेच्छा दिल्या आहेत.
✍🏻मुख्य संपादक – सुभाष कदम
