भारतीय ज्ञानप्रणाली ग्रंथदिंडीमध्ये
एस. एम. जोशी महाविद्यालयाचा उत्स्फूर्त सहभाग
डॉ.अतुल चौरे : हडपसर
प्रतिनिधी | हडपसर | दि. १३ डिसेंबर २०२५
शिक्षण मंत्रालय, भारत सरकार आणि सावित्रीबाई फुले पुणे विद्यापीठ यांच्या संयुक्त विद्यमाने पुणे पुस्तक महोत्सव २०२५ चे आयोजन संयोजक राजेश पांडे यांच्या मार्गदर्शनाखाली करण्यात आले आहे. वाचनसंस्कृती वृद्धिंगत करणे आणि सर्जनशील लेखन परंपरा जोपासणे हा या महोत्सवाचा मुख्य उद्देश आहे.
या पुस्तक महोत्सवाअंतर्गत आयोजित भारतीय ज्ञानप्रणाली ग्रंथदिंडी मध्ये रयत शिक्षण संस्थेचे एस. एम. जोशी महाविद्यालय, हडपसर येथील राष्ट्रीय सेवा योजना (NSS) विभाग व विद्यार्थी विकास मंडळ यांच्या संयुक्त विद्यमाने महाविद्यालयातील स्वयंसेवक व विद्यार्थ्यांनी उत्स्फूर्त सहभाग नोंदविला.
या ग्रंथदिंडीमध्ये विद्यार्थ्यांनी भारतीय गणित परंपरा या विषयावर माहितीपूर्ण फ्लेक्स तयार करून उपस्थितांमध्ये जनजागृती केली. भारतीय ज्ञानपरंपरेतील गणित, विज्ञान व तत्त्वज्ञानाचे महत्त्व विद्यार्थ्यांनी प्रभावीपणे मांडले.
महाविद्यालयाचे प्राचार्य डॉ. सुरेश साळुंखे यांच्या मार्गदर्शनाखाली या ज्ञानप्रणाली ग्रंथदिंडीचे आयोजन करण्यात आले. संपूर्ण कार्यक्रमाचे सुयोग्य नियोजन राष्ट्रीय सेवा योजनेच्या कार्यक्रमाधिकारी डॉ. ज्योती किरवे, प्रा. अजित जाधव, डॉ. सोपान आयनार, ग्रंथपाल शोभा कोरडे तसेच विद्यार्थी विकास अधिकारी डॉ. अतुल चौरे यांनी केले.
या ग्रंथदिंडीमध्ये राष्ट्रीय सेवा योजनेचे स्वयंसेवक व विद्यार्थी विकास विभागातील विद्यार्थी मोठ्या संख्येने उत्स्फूर्तपणे सहभागी झाले. विद्यार्थ्यांनी कला, साहित्य व संस्कृतीच्या संदर्भातील विविध ग्रंथांची खरेदी करून वाचनाची आवड जोपासली.
या उपक्रमामुळे विद्यार्थ्यांमध्ये वाचनाची गोडी निर्माण होण्यास तसेच भारतीय ज्ञानपरंपरेबाबतची जाणीव दृढ होण्यास निश्चितच मदत झाली, असे मत उपस्थितांनी व्यक्त केले.
✍🏻मुख्य संपादक – सुभाष कदम
