मुगाव : प्रतिनिधी
दौंड तालुक्यातील जिल्हा परिषद प्राथमिक शाळा मुगाव येथे वार्षिक स्नेहसंमेलन कार्यक्रम अत्यंत उत्साहात पार पडला. वार्षिक स्नेहसंमेलनात अंगणवाडी व जिल्हा परिषद शाळेतील विद्यार्थ्यांच्या कलागुणांनी सर्वांचे मने जिंकून घेतली. अशा कार्यक्रमातूनच विद्यार्थ्यांचे विविध गुण वाढीस लागून सृजनशीलतेचा विकास होतो. तसेच त्यांची कल्पनाशक्ती वाढीस लागते. सर्व विद्यार्थ्यांनी उत्कृष्ट कलागुण सादर केले असे मत दौंड पंचायत समितीच्या उपसभापती अमृता गिरमकर यांनी व्यक्त केले. देऊळगाव राजे केंद्राच्या केंद्रप्रमुख श्रीमती वैशाली जानराव यांनी याप्रसंगी उपस्थित ग्रामस्थांना मार्गदर्शन केले. स्वराज उद्योगसमूहाचे स्वराज यादव यांनी या कार्यक्रमास उपस्थित राहून कार्यक्रमास शुभेच्छा दिल्या व शाळेसमोर ब्लॉक बसवून देण्याचे मान्य केले. तसेच दिलासा मायक्रो फाउंडेशन चे चेअरमन कैलास चव्हाण यांनी शाळेत भौतिक सुविधा देण्याचे मान्य केले. स्नेहसंमेलन प्रसंगी दौंड तालुक्यातील शिक्षक मोठ्या संख्येने उपस्थित होते. गावच्या पोलीस पाटील राधिकाताई पाहाणे, तसेच शाळा व्यवस्थापन समितीचे सर्व सभासद, ग्रामस्थ व पालक यावेळी मोठ्या संख्येने उपस्थित होते.
यावेळी विद्यार्थ्यांनी विविध लोकगीते, लावणी, देशभक्तीपर गीते ,कोळीगीते, शेतकरी नृत्य असे विविध प्रकार सादर करून उपस्थित पालक व ग्रामस्थांची मने जिंकली. छत्रपती संभाजी महाराज यांच्या जीवनातील विविध प्रसंग सादर होत असताना उपस्थितांच्या अंगावर काटा येत होता. इतके सुंदर सादरीकरण विद्यार्थ्यांनी केले. या कार्यक्रमाचे सूत्रसंचालन रामचंद्र जगताप यांनी केले. कार्यक्रमाच्या यशस्वीततेसाठी शाळा व्यवस्थापन समिती अध्यक्ष महेश बागल तसेच संपूर्ण व्यवस्थापन समिती यांनी परिश्रम घेतले. हा कार्यक्रम यशस्वी होण्यासाठी शाळेचे मुख्याध्यापक दत्तात्रय शिंदे सर व उपशिक्षिका रूपाली शिंदे मॅडम यांनी परिश्रम घेतले. ग्रामस्थांनी देखील विद्यार्थ्यांच्या सादरीकरणाला भरभरून प्रतिसाद देऊन बक्षिसांचा वर्षाव केला.
✍🏻मुख्य संपादक – सुभाष कदम
