एस. एम. जोशी कॉलेजच्या राष्ट्रीय सेवा योजनेच्या सात दिवसीय विशेष श्रमसंस्कार शिबिराचा उदघाटन समारंभ संपन्न
डॉ.अतुल चौरे : हडपसर
प्रतिनिधी / १६ जानेवारी / हडपसर
रयत शिक्षण संस्थेचे, एस. एम. जोशी कॉलेजच्या राष्ट्रीय सेवा योजनेच्या वतीने सात दिवसीय विशेष श्रमसंस्कार शिबिराचा उदघाटन समारंभ मौजे खळद, ता. पुरंदर, जि. पुणे येथे उत्साहात पार पडला. कार्यक्रमाचे प्रमुख पाहुणे म्हणून वाघेरे कॉलेजचे राष्ट्रीय सेवा योजना कार्यक्रम अधिकारी प्रा. समीर कुंभारकर उपस्थित होते, तर अध्यक्षस्थानी महाविद्यालयाचे प्राचार्य प्रो. डॉ. एकनाथ मुंढे होते.
उद्घाटन प्रसंगी विद्यार्थ्यांना मार्गदर्शन करताना प्रा. समीर कुंभारकर म्हणाले, “शिक्षकांनी आणि विद्यार्थ्यांनी नवनिर्मितीचा ध्यास घेतला पाहिजे. इतिहास लिहिला जाईल तेव्हा चांगल्या गोष्टींमध्ये आपली नोंद व्हावी यासाठी सातत्याने काम करणे आवश्यक आहे. एन.एस.एस. स्वयंसेवकांनी समाजसेवेसाठी सदैव तत्पर राहावे. गावातील इतिहास, भूगोल समजून घेत सामाजिक परिवर्तनासाठी मनापासून कार्य करावे.”
याप्रसंगी सोमेश्वर साखर कारखान्याचे व्हाईस चेअरमन बाळासाहेब कामथे यांनी विद्यार्थ्यांना आत्मपरीक्षण करून समाजहितासाठी कार्य करण्याचे आवाहन केले.
अध्यक्षीय भाषणात प्राचार्य प्रो. डॉ. एकनाथ मुंढे म्हणाले, “पद्मभूषण डॉ. कर्मवीर भाऊराव पाटील यांनी शिक्षणाची गंगा महाराष्ट्रासह कर्नाटकापर्यंत पोहोचवली आहे. विद्यार्थ्यांनी शाश्वत विकासासाठी प्रयत्नशील राहावे. ‘बाली’ शहरातील नागरिकांनी सातशे वर्षांपासून स्वयंशिस्तीने ठेवलेला आदर्श आपण आत्मसात करायला हवा. ग्रामीण संस्कृतीतील चांगल्या गोष्टी शिकून समाजहितासाठी त्यांचा वापर करणे ही एन.एस.एस.ची खरी भावना आहे.”
कार्यक्रमाला खळद ग्रामपंचायतीच्या सरपंच सौ. रोहिणी योगेश कामथे, उपसरपंच सौ. आशा सुरेश रासकर, पोलीस पाटील सौ. वृषाली कादबाने, माजी सरपंच संदीप कादबाने, माजी सदस्य दिगंबर कामथे, सोपान काका कामथे, माजी उपसरपंच विलास कादबाने, संदीप नव्हे सर तसेच महाविद्यालयातील प्रा. किसन पठाडे, डॉ. अतुल चौरे, प्रा. स्वप्नील ढोरे यांची उपस्थिती होती.
कार्यक्रमाचे प्रास्ताविक कार्यक्रम अधिकारी डॉ. ज्योती किरवे यांनी केले. पाहुण्यांची ओळख कार्यक्रम अधिकारी डॉ. अजित जाधव यांनी करून दिली, तर आभार प्रदर्शन कार्यक्रम अधिकारी डॉ. सोपान आयनर यांनी केले. कार्यक्रमाचे सूत्रसंचालन प्रा. जयश्री कांबळे यांनी केले. उद्घाटन समारंभासाठी राष्ट्रीय सेवा योजनेचे सर्व स्वयंसेवक तसेच खळद ग्रामस्थ मोठ्या संख्येने उपस्थित होते.
✍🏻मुख्य संपादक – सुभाष कदम
